Bog'lanish

Telefon
(+998 71) 203-60-03

Elektron manzil
toshkent@adliya.uz

Habarni yuborish
Ishonch telefoni 1008

Янгиликлар

02

Соғлом оила - соғлом жамият

DSC02083.JPG“Наврўз” давлат қабуллар уйи биносида Тошкент шаҳар Адлия бошқармаси, Тошкент шаҳар хотин-қизлар қўмитаси, давлат ва нодавлат ташкилотлари ҳамкорлигида Тошкент шаҳар “Наврўз” никоҳ уйи ва Чилонзор тумани ФҲДЁ бўлими қошидаги “Оила муҳаббат қасри” деб номланган ёш оила қурувчилар мактабининг XI-семинар машғулоти ташкил этилди.

Ўзбекистон Республикаси Конституциясининг 63-моддасида белгиланганидек, “Оила мамлакатнинг асосий бўғинидир, ҳамда жамият ва давлат мухофазасида бўлиш ҳуқуқига эга”.

Ёш оила қурувчилар мактабининг асосий мақсади ёшларга оила тўғрисидаги қонунчилигимизнинг мазмун-моҳиятини етказиш, уларни мустақил ҳаётга тайёрлаб бориш, соғлом оила барпо этилишида тиббий кўрикнинг аҳамиятини тушунтириш, жамиятда ўзига муносиб ўрин топишда кўмак бериш, мустаҳкам оила вужудга келиши учун ёш оилаларнинг ҳуқуқий онги ва маданиятини юксалтиришдир.

DSC02083.JPGТадбирда бўлажак келин-куёвларга оила қонунчилиги, никоҳдан олдинги тиббий кўрикнинг моҳияти, соғлом турмуш тарзи, диний ақидалар, соғлом фарзандни дунёга келтириш, уларни ҳар томонлама етук ва баркамол қилиб тарбиялаш асослари, эрта ҳамда қариндошлар ўртасидаги никоҳнинг салбий оқибатлари ҳаётий мисоллар билан тушунтирилди.

Фарзандларни тарбиялаш, уларни ягона мақсад сари бирлаштириш, жамиятда иқтисодий-ижтимоий тараққиётни таъминлаш ҳар бир оила олдидаги долзарб вазифадир. Президентимиз таъкидлаганидек, бу ёруғ дунёда ҳаёт бор экан, оила бор. Оила бор экан, фарзанд деб аталмиш бебаҳо неъмат бор. Фарзанд бор экан, одамзот ҳамиша эзгу орзу ва интилишлар билан яшайди.

Шунингдек, Семинар машғулотида “Конституцияда инсон, жамият ва давлат манфаатларининг мувозанати”, “Соғлом оила - соғлом жамият”, “Ёш оилаларни моддий қўллаб-қувватлашда кредитнинг роли ва аҳамияти”, “Никоҳдан олдинги тиббий кўрикнинг аҳамияти”, “Оилада миллий қадриятлар” мавзуларида чиқишлар қилинди.